Gschicht vo de Luuskaibe.

Vor dr Fasnacht 1969 hän sich acht glungeni Dissi zämme do, e Strauwaage baut, sich bim Comitée als Luuskaibe agmäldet und sind als Waggis uf d’Pischte. Das het aber nit lang glängt; e paar dervo hän scho als Buebe glehrt drummle, anderi hän scho kenne pfyffe und dr Räscht – dr Räscht het afo iebe: Äschlemer, Arabi, Gluggsi, Tango. Scho die nägschti Fasnacht isch’s e glatti Combine gsi – z’Mittag mit em Waage am Cortège und z’Obe mit Drummle und Pfyffe am Gässle.

Vo allem Aafang aa hän d’Luuskaibe das Signet mit dr Alte Dante gha; mängge froggt, worum den grad die alti Dante als Signet? Lueg emol d’Blagette us em Johr 1969 genau a!

1972 isch die erscht Ladärne baut und sälber gmolt worde. Und s’Johr druf het’s e wundersams Sujet gäh: «Waageverbrennig» – d’Luuskaibe hän sich zer Dambuure- und Pfyffer-Glygge gmuuseret, no mit eme «Schmalspur-Repertoire» s‘ erschti Mol vor em Comité defiliert.

Zer Fasnacht 78 isch s’Goschdyym «dr Luuskaib» gschaffe worde – s’isch nonig so beriemt wie dr Waggis oder dr Dummpeter. Syt denn haltet me sich an d’Tradizion, an jeedere Fasnacht mit eme neue Sujet ufzwarte, Larve und Goschdym sind glägentlig scho bruucht, aber immer e weenig ufgmotzt und uf s’Sujet aapasst. Es wird die tradizionelli Fasnacht pfläggt, aber uf e ehnder ungezwungeni und lockeri Art.

Us de 8 Gründer isch d’Clique bis hüt uf 30 Luuskaibe gwagse. Uf d’Lengi isch es fir d’Drummler nit so glatt gsi, z’dritt oder z’viert in fascht zwanzig Pfyffer z’laufe; drum hän alli Verständnis gha, dass ain um dr ander zue nere Clique mit mehr Tamboure abgwanderet isch. D’Luuskaibe ziehn syt e paar Johre als Pfyffergruppe dur d’Stadt. Im Repertoire sind die scheene, alte Märsch mit neuere Komposizione und heerlige Pfyffermärsch ergänzt worde.

Pfyffermarsch «Dr Luuskaib»

Im Joohr 2001 het d’Annemarie Weder de Luuskaibe en eigene Pfyffermarsch gschänggt, wo vom Walter Zandona komponiert worde isch.

Mehr zum Marsch…

Goschdyym «Dr Luuskaib»

Im 1978 isch s’erschte Luuskaibe Goschdyym gschaffe worde, welles im 1994 e glaini Uffrüschig biko het. Uf em Bild seht me s’aktuelli Goschdyym.

 

l

1969

sind d’Luuskaibe gründet worde.

1972

isch die erscht Ladärne baut und gmolt worde.

1978

isch s’Goschdyym «dr Luuskaib» gschaffe worde.

2001

isch unsere Pfyffermarsch «Luuskaib» komponiert worde.

Momänt us über 45 Joor Luuskaibe

Pin It on Pinterest

Share This